سياسة الخصوصية
الصفحة دي بتشرح إيه البيانات اللي بنجمعها لما تطلب من KidX، وليه بنجمعها، وبنحتفظ بيها قد إيه، ومين بيوصلها، وإزاي تطلب حذفها.
مين المسؤول عن بياناتك
- المسؤول عن الخدمة والبيانات: KidX
- الإيميل: [email protected]
- التليفون وواتساب: +201055151506
- العنوان: القاهرة، جمهورية مصر العربية
- للتواصل بخصوص الخصوصية أو حذف البيانات: [email protected]
البيانات اللي بنجمعها
بيانات ولي الأمر: الاسم، ورقم الموبايل (واتساب)، والعنوان لو كتبته.
بيانات الطفل: الاسم الأول، والسن، والنوع، ولغة المحتوى، وصورة أو أكتر للطفل. الصورة هي اللي بنرسم منها شخصية الطفل في القصة أو الفيديو.
الموقع الدقيق (اختياري): لو دوست «حدّد موقعي» ووافقت في المتصفح، بنحفظ إحداثيات مكانك عشان التوصيل بس.
بيانات الحساب: بنعمل لك حساب تلقائي برقم موبايلك عشان تتابع طلباتك وتحمّلها، وبيوصلك رقم سري مؤقت على واتساب.
بيانات الدفع: الدفع الإلكتروني بيتم عن طريق Paymob. إحنا ما بنشوفش ولا بنخزّن رقم الكارت. ولو دفعت بتحويل يدوي، بنسجّل إنك أكّدت الدفع والمبلغ.
النشرة البريدية (اختيارية): لو اشتركت فيها بنحفظ إيميلك بس.
ليه بنجمعها
- عشان ننفّذ طلبك: نرسم شخصية طفلك، ونعمل القصة أو الفيديو باسمه، ونسلّمهولك.
- عشان نتواصل معاك بخصوص طلبك على واتساب أو التليفون.
- عشان تقدر تدخل حسابك وتحمّل طلباتك في أي وقت.
- عشان نحتفظ بسجلّ الطلبات والمبالغ المدفوعة.
- عشان نبعتلك رسايل تسويقية، بس لو وافقت عليها صراحةً. وتقدر تلغيها في أي وقت.
ما بنستخدمش صورة طفلك ولا بياناته في أي حاجة غير تنفيذ طلبك.
بيانات الأطفال
الخدمة دي بيطلبها ولي الأمر، مش الطفل. قبل رفع صورة أي طفل بنطلب منك إقرار منفصل إنك ولي أمره أو الوصي عليه، وإنك موافق على استخدام بياناته لتنفيذ الطلب بس. بنقبل أعمار من 2 لحد 10 سنين.
بنحتفظ بالبيانات قد إيه
- صور الأطفال الأصلية: بتتحذف من أجهزتنا بعد 7 أيام من تسليم الطلب.
- القصص والفيديوهات النهائية: بتفضل متاحة ليك تحمّلها في أي وقت، لحد ما تطلب حذفها.
- بيانات الطلب والمبالغ: بنحتفظ بيها كسجلّ للطلبات. لو طلبت حذف بياناتك، الاسم والتليفون والعنوان بيتشالوا، وبيفضل المبلغ والتاريخ والمنتج بس.
- الحساب: بيفضل موجود لحد ما تحذفه بنفسك أو تطلب حذفه، حتى لو ما دخلتش عليه مدة طويلة.
- الموقع الدقيق: بيتحذف تلقائيًا بعد ٩٠ يوم، أو قبلها لو طلبت.
- سجلّ الموافقات: بنحتفظ بيه كدليل على اللي وافقت عليه. ما فيهوش اسمك ولا رقمك، فيه رقم الطلب والوقت ونسخة النص اللي وافقت عليه بس.
- سجلّات السيرفر: كل زيارة أو طلب للموقع بيتسجّل فيه عنوان الـIP بتاعك ووقته والصفحة اللي طلبتها، عشان حماية الموقع ومتابعة الأعطال. بنحتفظ بالسجلّات دي بشكل دائم.
- بلاغات حماية الموقع: لو متصفحك منع حاجة غريبة من إنها تتحمّل على صفحتنا، بيبعتلنا بلاغ فيه الصفحة وعنوان الـIP. البلاغات دي بتتمسح تلقائيًا بعد ٣٠ يوم.
مين بيوصل لبياناتك
- Paymob: بياخد بيانات الدفع لما تدفع أونلاين.
- Cloudflare: كل زيارات الموقع بتعدّي من خلاله، وبنخزّن عليه القصص والفيديوهات النهائية عشان تقدر تحمّلها وتعاينها.
- فريق التنفيذ: بيساعدنا في تنفيذ الطلبات، وبيوصل للوحة التشغيل كلها، بما فيها صور الأطفال وبيانات أولياء الأمور.
- واتساب: لما بنتواصل معاك أو لما تدوس زرار واتساب، الرسايل بتعدّي على واتساب.
- خرايط OpenStreetMap: لو فتحت الخريطة عشان تحدّد مكانك، متصفحك بيحمّل الخريطة من OpenStreetMap، وده بيوصّلهم عنوان الـIP بتاعك.
ما بنبيعش بياناتك لحد.
الكوكيز
بنستخدم كوكيز ضرورية بس لتشغيل الموقع وتسجيل الدخول والحماية. تفاصيلها في سياسة الكوكيز.
حقوقك
- تعرف إيه البيانات اللي عندنا عنك، وتصحّح أي حاجة فيها غلط.
- تسحب موافقتك على الرسايل التسويقية في أي وقت.
- تطلب حذف بياناتك من صفحة طلب حذف البيانات، أو تحذف حسابك بنفسك من «حسابي».
لأي طلب تواصل معانا على [email protected].
لو السياسة اتغيّرت
كل تعديل بياخد رقم نسخة جديد وتاريخ سريان جديد، ومكتوبين فوق الصفحة. ولو التعديل بيأثر على موافقتك، هنطلب منك توافق تاني في طلبك الجاي.